أحمد العوضي ومشهد «الضرب الحقيقي».. ميرنا نور الدين تروي التفاصيل

كشفت الفنانة المصرية ميرنا نور الدين عن كواليس مشاهد الحركة في مسلسل "فهد البطل"، مشيرةً إلى أنها تعرّضت لإصابة حقيقية خلال أحد المشاهد مع الفنان أحمد العوضي.

وفي حوارها مع الإعلامية فاطمة مصطفى عبر برنامج "الراديو بيضحك" على إذاعة الراديو 9090، قالت ميرنا: "فيه ناس فاكرة إن أحمد العوضي ما بيضربش بجد في المشاهد، بس أنا قلت له هقول للناس إنك ضربت الكل من غير استثناء. هو فعلاً كان بيضرب، لكن عنده تكنيك معين بيخلي الضرب واقعي وفي نفس الوقت محسوب".

وأضافت: "في أحد المشاهد، اتعرضت لإصابة بسبب قوته، وكان لابس خاتم أثر في وشي، وكمان مسكته لإيدي كانت أقوى من الضرب نفسه. ولما ضربني بالقلم، قال لي إنه محتاج أعيش المشهد، وبالفعل حسيت بإحساس المشهد بعد ما خلصنا".

وتابعت: "دي مش أول مرة أشتغل مع العوضي، لكن المرة دي كانت أول مرة يكون بينا تفاعل كبير. أحمد مش من النوع اللي يركّز على نفسه بس، بيهتم إن كل الناس حواليه يطلعوا بأفضل صورة. كنا دايمًا بنتناقش في تفاصيل المشاهد، وأحيانًا كان بيهزر معانا أنا وكارولين عزمي وعصام السقا. مثلاً، كنت بقول كلمة 'بالله' بطريقة غلط، وكان دايمًا يصححها لي ويهزر ويقول إني بمثّل في مسلسل 'كناريا'".

يُذكر أن مسلسل "فهد البطل" يضم نخبة من النجوم، أبرزهم: أحمد العوضي، أحمد عبدالعزيز، محمود البزاوي، لوسي، كارولين عزمي، يارا السكري، عصام السقا. العمل من تأليف محمود حمدان، وإخراج محمد عبدالسلام.