انتصار تهاجم شيماء سيف: "دايما تتكلم عني.. هو أنا مرات أبوها؟" (فيديو)

هاجمت الفنانة المصرية انتصار، مواطنتها شيماء سيف، بعدما قالت إنها تآمرت عليها لإبعادها عن برنامج "نفسنة" موضحةً: "سمعت إني قولت كده إزاي.. محسساني إنها كانت في بنها وجات عدت من قدام الأوضة اللي كنا بنتكلم فيها عليها".

وأضافت انتصار، خلال حوارها مع الإعلامية بسمة وهبة مقدمة برنامج "العرافة"، على قناة "المحور": "هي عاملة مسلسل، وبتقول عديت قدام الباب وواجهتهم وفتحت الباب، معندهاش حاجة تتكلم فيها في البرامج، وبتدور على أي حاجة تتكلم فيها، فمين مشهورة في حياتها عشان تتكلم عليها؟! انتصار". 

وتابعت: "طول النهار بسمع سيرتي في البرامج، طول النهار أسمع سيرتي ومش بعلق، مش برد عليها، اتكلمنا عليها في الغرفة، كنت بنتكلم على حاجة في الشغل، كنا بنقدم البرنامج 3 مع بعض، أنا وهي وهيدي كرم، مشاكلها كتير، وعشان كده طلعنا نتكلم، بتقطع في الكلام". 

وأردفت: "كنا بنتكلم على البرنامج ومشاكل الشغل العادية، إيه اللي خلى مشاكل البرنامج تطلع في البرامج، أي شغل فيه مشاكله، لكن أنا شغلانتها، وطول النهار تتكلم في سيرتي، رغم إن البرنامج بقاله 5 سنين مش بيتعمل، ده لو جريمة كانت سقطت.. شايلة مني ليه؟! هو أنا مرات أبوها".

وقالت الفنانة انتصار، إن عمر مشوارها الفني 23 سنة، كما انها عزباء، وأكثر ما تكرهه في حياتها الظلم، كما تعرضت للأذى من زملاء لها بالوسط الفني، مضيفة: "أنا على طول في معارك.. اللي مش بيتخانق في الشغل سلبي ومش عاوز يوصل للأحسن"

وأضافت: "أنا شايفة إني أخدت حقي في الوسط تالت ومتلت وزيادة"، مشيرةً إلى أنها ليست سريعة الغضب، حتى أن المقربين منها يقولوا لها "أنتِ باردة في انفعالاتك".

وتابعت: "لا أندم على ما فاتني، وأحرص على النظر إلى الأمام بشكل مستمر، أنا مش بخاف، وبخاف من ربنا، وأنا دايما في معارك، مينفعش تبقي بتشتغلي ومتتخانقيش، أصل إحنا مش ملاك بجناحين، واللي مش بيتخانقوا معندهمش طلبات أو سلبيين ولا يأملون إلى الأحسن والأجود".