كشفت الفنانة المصرية الشابة هدى المفتي عن تفاصيل أحدث أعمالها مسلسل "مطعم الحبايب"، وتحدثت عن الشخصية التي تجسّدها.
وقالت هدى المفتي، في تصريحات خاصة لـ"العين الإخبارية"، إن "قصة مسلسل (مطعم الحبايب) تدور حول مطعم كان مغلقا من زمن، وهو مطعم جدة وديدة أبوالمجد، لكن والدها قرر يفتحه ويشغل المطعم من تاني، وهنشوف إيه اللي هيحصل في المطعم".
وأوضحت الفنانة الشابة أنها تقدم دورا مختلفا عما جسدته سابقا، مضيفة: "الشخصية دي بتعلمنا إزاي ما نحكمش على الشخص قبل ما نعرفه كويس، ونعرف قلبه من جوه عامل إزاي".
ووصفت المفتي "وديدة"، التي تجسد دورها في العمل، بأنها "شخصية حالمة وطموحة ومضحية وذكية وطيبة ودمها خفيف، وفي نفس الوقت بتواجه الكثير من الأزمات".
ورأت الفنانة المصرية أنها و"وديدة" تجمعهما بعض الصفات، قائلة: "أحيانا بكون حالمة شوية وبس"، وتمنت أن يعجب دورها الجديد المشاهدين.
وعن تعاونها للمرة الخامسة مع أحمد مالك، قالت هدى المفتي: "أحمد ممثل ذكي ومثقف وطول الوقت بيشتغل على نفسه، وده بيخلي الممثل اللي أمامه مرتاح، وده اللي بيخلق الكيميا"، مستطردة: "أنا اتعلمت منه، وأي ممثلة تحب تشتغل معاه جدا".
وعن علاقتها بالفنان أحمد مالك خارج إطار العمل الفني، قالت المفتي: "إحنا أصدقاء جدا، وأحمد إنسان مثقف ونعرف بعض من زمان، وبينا صداقة محترمة".
عن تحمسها لبطولة مسلسل "مطعم الحبايب"، قالت الممثلة الشابة: "أكتر حاجة حمستني إنه بيتكلم عن عالم الطبخ، وده عالم ماشتغلتش فيه قبل كده، وكمان دايما بنشوف المطاعم من بره بس مابنشوفش الدراما اللي بتحصل ورا، وهو عالم مختلف جدا".
بشأن علاقتها بالمطبخ في الواقع، قالت: "علاقتي بيه كويسة جدا، وبحب أطبخ بس حاجات وحاجات"، وكشفت عن بعض الأصناف التي تحب طهيها، قائلة: "بحب أعمل بامية ومسقعة وبسلة وفاصوليا، وبحب أطبخ الخضار جدا، وبعرف أعمل فراخ بالزعتر وزيت الزيتون في الفرن".
مسلسل "مطعم الحبايب" من بطولة أحمد مالك وهدى المفتي وبيومي فؤاد وانتصار وعايدة رياض وسامي مغاوري وإسلام إبراهيم، وضيوف الشرف وعلى رأسهم عبير صبري، والعمل من تأليف مريم نعوم، إخراج عصام عبدالحميد وإنتاج عبدالله أبوالفتوح.
