كريم قاسم يدافع عن ريهام حجاج: تتعرض للظلم

انتقد الفنان كريم قاسم اتهام البعض للفنانة ريهام حجاج بالتسبب في اتخاذ الفنان توفيق عبد الحميد قرارا باعتزال التمثيل،

وقال كريم قاسم في مقابلة، أعادت ريهام حجاج نشرها عبر حسابها الشخصي على تطبيق "أنستقرام"، تحدث خلالها عن تفاصيل تعاونه للمرة الثانية مع النجمة ريهام حجاج من خلال مسلسل "يوتيرن": "المسلسل واجه افتراء من بعض الناس، حد يطلع يعمل مونتير ويقولك أنا اشتغلت وهو أصلا مالهوش علاقة بالمسلسل".

وأضاف: "واحدة تتكلم على التتر وتقولك أصلها ظلمتني، يا جماعة أنتو بتلغوا مؤسسة كاملة، في شركة إنتاج وفي مخرج وفي ناس تانية بتاخد قرارات، أنا عمال أغني الظلم ظلمات بتاعت التتر بسبب المواقف دي، وابتديت أحس إن في حاجة ممنهجة، بالذات ضد ريهام".

وأضاف: "أنا متفهم إن فيه ناس ممكن ما تحبش ممثل، لكن لما جيت أركز شوية، ولما تابعت الكومنتات، لقيت حوالى 70 ٪ منها صفحات عمرها ما نشرت بوستات، وبالمناسبة أنا تاني سنة أشتغل مع ريهام حجاج ما شوفتش منها حاجة واحدة وحشة، بل بالعكس وقفت جنبي كتير، أوقات كتير ماكنتش قادر أشتغل سواء السنة دي، أو السنة قبل اللي فاتت أو متضايق من حاجة أو كدة، كانت هي تتدخل وتحل رغم إن ده مش شغلانتها، فعلا أنا ما شوفتش منها حاجة واحدة وحشة".

وتابع: "أما فيما يتعلق بالأستاذ توفيق، إحنا كلنا اتفاجئنا إنه نزل البوست دا في التوقيت دا، بس أنا برضه مع شغلي معاه مقدر جدا، لأن الظروف اللى بنشتغل فيها اتغيرت، إحنا بنصور يوميا 14 و18 ساعة وأحيانا بنوصل لـ 23 ساعة يوميا، وطبعا أنا مقدر ظروفه الصحية".

يذكر أن مسلسل "يوتيرن" يشارك في بطولته بجانب ريهام حجاج ، وكريم قاسم، توفيق عبد الحميد، وصفاء الطوخي، والعمل من إخراج سامح عبد العزيز.