محمود سعد يصدم الجميع: لا أحب والدي ولا أحترمه (فيديو)
صدم الإعلامي المصري محمود سعد الجميع بتصريحاته الأخيرة عن والده، كاشفًا عن أنه لا يحبه ولا يحترمه.
وقال محمود سعد، في مقطع فيديو عبر "فيسبوك"، أمس الخميس بعنوان "الراجل ده أنا مابحبوش ولا باحترمه": "يوم ما انتقل والدي إلى جوار الله، كنت بقول إني مش هزعل لأن بيني وبينه هجر وغدر، وجرح في قلب، بيني وبينه طريق وفراق وطريق هو اللي بدأه".
وأضاف الإعلامي المصري: "والدتي فضلت 27 سنة تربي في 4 عيال، مهتمتش ولا استمتعت بحياتها، أسرتها كانت عادية، لكن ربنا ساعدها. لما والدي توفي كنت في مكتبي، والدتي بلغتني وطلبت مني أروح له بسرعة، وبالفعل، سيبت الشغل ونزلت".
وواصل قائلًا: "والدي كان موصي أخويا الكبير قبل ما يموت أنه يدفن مع جدتي من أمي؛ لأنه كان بيحبها جدًا، ووالدتي طلبت مني أنزل نعي في الجرنال، قولت لها الناس متعرفش إن ليّ أب أصلا، لكن أمي أصرت على العزاء".
محمود سعد: "لم أتأثر بوفاة والدي"
وتطرق محمود سعد إلى يوم وفاة والده، كاشفًا عن أنه لم يتأثر بخبر رحيله: "لما والدي توفي متأثرتش ولا كنت حاسس بحاجة، أنا حتى مش فاكر هو مات امتى، أن أبويا كان خالع نفسه من حياتنا رغم أنه كان غني".
في المقابل، أعرب الإعلامي المصري عن تقديره لوالدته: "رغم إني تربية أمي، نجحت ومطلعتش مجرم ولا صايع، لكن لغاية دلوقتي لما اسمع حد بيتكلم عن أبوه بتضايق، ولما كبرت بقيت أقول أبويا قالي إيه أو إيه الذكرى اللي سابهالي ملقتش حاجة".
وختم مقدم برنامج "البيت بيتك" سابقًا: "لكل أب مبيسألش على عياله، مراتك أنت وهي أحرار، لكن العيال هتكبر ومش هتنسى، هتفضل تيجي سيرتك بشكل مش كويس، وإنك تسأل على عيالك دي مش رحمة ولا مودة منك.. ده واجب، إزاي تصب غضبك من مراتك على عيالك؟".
