ممثل مصري يعلن اعتزاله الفن: "هاين عليا أرمي نفسي من البلكونة"

أعلن الممثل المصري شريف إدريس، الخميس، عن اعتزاله الفن، عبر حسابه في فيسبوك، ما أثار موجة تعاطف كبيرة معه.

وشكا إدريس من قلة العمل وازدياد الديون عليه، الأمر الذي وصل به إلى اعتزامه بيع هاتفه.

وكتب شريف إدريس على فيسبوك: "بسم الله الرحمن الرحيم.. بعد 35 سنة سعي وتعب وشقا في الوسط الفني، قررت الاعتزال والابتعاد تماماً وتغيير مسار حياتي وأي حد عنده فرصة سفر ليّا هاكون شاكر ليه وده طلبي الوحيد.. وده قرار أخدته بعد ما الأمور وصلت في الوسط الفني لمرحلة عبثية وصلت إني بقيت بشوف بعض الزملاء بيشحتو الشغل علني علشان يشتغلوا".

• نادين نجيم.. إطلالة أنيقة تجذب الأنظار

وأضاف: "لو الأمور وصلت لكده أبعد أحسن.. وحتى لما بيجي شغل بيتفرض عليك توافق بأقل الفلوس وتخرج من الشغل مديون.. ومواقف مهينة.. طب خلو الديكور يمثل".

وتابع: "هحكيلكم موقف حصل معايا من أسبوع.. اتصل بيّا حد قالي عايزين حضرتك بكره عندك تصوير في مسلسل كذا بس هتدفع عشرة في المية للكاستينج دايريكتور.. كان هيجيلي جلطة بعد ما قفلت المكالمة ووافقت علشان أنا محتاج أشتغل ومحتاج فلوس.. ومقدرتش أستوعب الفكرة بصراحة إني بعد العمر ده مضطر أدفع علشان أشتغل فاتصلت واعتذرت.. وده الحال حالياً إن الأمور بقت في إيد كاستينج دايريكتور.. وده موقف من مواقف كتير مريت بيها لو حكيتها محتاجة كتاب مش بوست عالفيس فطالما الشغل بقى لازم يتدفعله.. وطالما الشغل بقى بالشحاتة.. يبقى بلاش أحسن".

وأوضح: "أنا طول عمري راضي الحمد لله بس حقيقي أنا وصلت لمرحلة اكتئاب وصلتني إني بقيت بنام أحلم بكابوس إني بقتل عيالي وبقتل نفسي لأني وصلت لمرحلة نفسية ومادية إني بقيت مش قادر أربيهم ولا أصرف عليهم وأنا عندي تلات أطفال بعبدهم عبادة متخيلين حجم المسؤولية.. وبقيت مديون لطوب الأرض".

واستطرد: "حقيقي لو حد عنده فرصة سفر ليّا هاكون شاكر ليه جداً وهيكون جميل في رقبتي لحد ما أموت لأن حقيقي أنا مش قادر أعيش في البلد دي تاني.. أنا حاولت أسعى في أي مجال تاني بس مقدرتش".

واختتم إدريس شكواه قائلاً: "وحقيقي لو اتعرض عليّا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمد لله على كل شيء.. همسح أبلكيشن فيسبوك من تليفوني لإني هنزل أبيع تليفوني أصلاً.. فأنا هاكون متاح أونلاين لحد بالليل.. لو حد عنده فرصة شغل وسفر ليّا ومش معاه رقمي يا ريت يجيبه من أي حد.. ملحوظة: أنا مش محتاج طبطبه من حد أنا محتاج فرصة سفر وشغل تخليني أعيش ولادي حياة كريمة وبس.. شكراً ليكم محبتي للجميع هاين عليّا أقوم أرمي نفسي من البلكونة بعد ما وصلت إني أكتب البوست ده".

شريف إدريس ممثل مصري، بدأ العمل بالتمثيل وهو طفل، وكانت بداية ظهوره في منتصف الثمانينيات بأعمال تلفزيونية وسينمائية.

ومن أعماله السينمائية "الاتحاد النسائي، أسعد الله مساؤك، المفسدون"، ومن أعماله التلفزيونية "على باب الوزير، عفاريت السيالة، الهروب".