ياسمين عز للسيدات: "بروتين الشعر مضر بفلوس الزوج واعملوا بطة بالبرتقال" (فيديو)

تواصل الإعلامية المصرية ياسمين عز، إثارة الجدل عبر برنامجها "كلام الناس" على فضائية "إم بي سي مصر"، بتقديمها النصائح الغريبة للسيدات.

وقالت الإعلامية المصرية إن العديد من الزوجات منزعجات من عدم ملازمة الأزواج لهن، أثناء الخروج في مكان عام، حيث يحرصوا على السير أمامهن بمسافة 50 أو 60 مترا.

• "التفخيم والتنعيم".. ياسمين عز تثير الجدل بفيديو جديد

وعلقت ياسمين عز على ذلك، قائلة: "إيه اللي ممكن يضايقك من الحركة دي؟.. الحركة دي تدل على عظمة الرجل، هو بيعمل كده من روح الفرعون اللي جواه ومتلبساه، مش عشان مكسوف يمشي جنبك، ولا فيه واحدة تانية بيكلمها، ولا مش عايزك تسمعيه وهو بيتكلم في التليفون".

وتابعت: "زوجك بيحاول يعيشك جو المواكب الملكية الفرعونية، الراجل ماشي قدامك عشان يأمن لك الطريق، مش يمكن الخمسين متر اللي قدامك دول فيهم حفرة أو فيهم حد هيعاكسك، افترضي دايما حسن النوايا مع الفرعون بتاعك، هما الكام متر دول اللي هيبوظوا اليوم؟، ارحمي الراجل شوية".

وأضافت: "هو نازل معاكي يوم إجازته وساب النوم عشان يبسطك، وعلميا تم إثبات إن الست بتاخد بالها من تفاصيل دقيقة أكتر من الراجل، اللي لو مر واحد جنبه من غير راس مش هياخد باله".

كما وجهت ياسمين عز نصيحة أخرى للسيدات اللاتي يطلبن أموالا من أزواجهن ، قائلة: "فيه موضوع بقى منتشر وأنا طالعة أحذر منه، مش أول ما جوزك يكون معاه فلوس، تقوليله اديني فلوس أعمل شعري بروتين.. بروتين إيه يا مدام؟".

وتابعت الإعلامية المصرية: "انتي طول عمرك عايشة بتسريحة الأناناسة.. حبكت أول ما جوزك مسك فلوس في إيده عايزة تروحي تعملي بروتين لشعرك.. البروتين مش كويس ومضر بالصحة وبفلوس جوزك".

وخاطبت ياسمين عز السيدات: "أقول لك تعملي إيه.. تجيبي بطة وتعملي صينية بطة بالبرتقال.. ده اللي هيفيدك، كده كسبتي جوزك واتغذيتي غذاء مفيد، بروتين طبيعي وخدتي فيتامين c من البرتقال يفيد البشرة والشعر.. محدش يجيب سيرة البروتين، وبلاش التقاليع الجديدة وجاية لنا من برا غلط".