عارفة عبد الرسول تكشف سبب نجاح مسلسل "بالطو" وتوجه نصيحة للفتيات
كشفت الفنانة المصرية عارفة عبدالرسول، سبب نجاح مسلسل "بالطو"، الذي عُرض الفترة الماضية عبر إحدى المنصات الإلكترونية.
وقالت الفنانة المصرية، عبر حسابها الرسمي على موقع "فيسبوك": "كلمتين محشورين فى زوري حاقولهم ورزقي على الله.. ليه مسلسل بالطو نجح النجاح المدوي ده.. لأنه شبهنا بتاعنا".
وأضافت: "مفيش حد ماشافش حتة منه أو حد شبهه في طرشوخ الليف.. تقول لنفسك فجأة.. آه والله كان بيحصل كده.. إحنا كممثلين ماكناش إحنا.. بس كنا إحنا".
وتابعت: "في كلمه قالها لي المخرج عمر المهندس على جنب كده، لما كان بيعمل الكاستينج للمسلسل، داخ عشان يلاقى بنت شبهنا من طبقة متوسطة، ومن مدينة في الريف تبقى دكتورة في وحدة صحية في أرياف برضه.. كل البنات لاعبة في شكلها وتاتو وشفايف وحواجب.. كلهم دكتور تجميل واحد عامل قالب واحد".
وأشارت الفنانة عارفة عبدالرسول إلى سبب اختيار الفنانة مريم الجندي لأداء دور الطبيبة، قائلة: "وقع الاختيار على مريم الجندي، لأن كان شكلها العادي.. بنتنا.. مننا.. مش عشان هي بنت محمود الجندي ولا أخت أحمد الجندي، ولا عشان هي ممثلة كويسة، رغم أنها ممثلة ممتازة، ولا عشان كانت في ورشه أستاذنا خالد جلال، ولفت لفة حلوة على المسرح، اتكحرتت يعني، كل ده مكانش سبب لترشيحها للدور".
ووجهت الفنانة المصرية رسالة للفتيات، قالت فيها: "صرخة مكتومة من قلبي للبنات.. أرجوكم.. حبي شكلك اللي ربنا وهبه لك.. مناخيرك كبيرة شوية وماله دي ميزة.. سنانك معووجة ما يضرش دي ميزة.. أرجوكم كونوا عاديين".
مسلسل "بالطو" شارك فيه عدد كبير من الفنانين، أبرزهم عصام عمر، ومحمد محمود، ومحمود البزاوي، وسلافة غانم، ومحمد رضوان، وعارفة عبدالرسول، ومريم الجندي، وهو من إخراج عمر المهندس وتأليف أحمد عاطف فياض.
