حقيقة أغنية «كنا صغيرين».. هيثم نبيل يكشف التفاصيل ورامي جمال يعتذر
كشف الملحن هيثم نبيل تفاصيل ملابسات أغنية «كنا صغيرين» بعد طرحها بصوت رامي جمال، فيما أكد الأخير أن ما حدث كان نتيجة خطأ غير مقصود، موضحًا أنه استكمل جميع الإجراءات القانونية اللازمة.
وأوضح هيثم نبيل، عبر منشور نشره على حسابه الرسمي بموقع "فيسبوك"، قائلًا: «منعًا للغط وكلام كتير بيتبعتلي النهاردة سواء من جمهور أو من صحفيين، هي فعلًا أغنية "كنا صغيرين" بتاعتي في ألبومي الأول (كملنا بعض)، وده مش تشابه، لكن ده لحن مختلف غير لحني اللي كنت عاملها بيه».
وأضاف: «الحكاية إن فنانين كتير حابين يخلدوا ذكرى أخونا الغالي محمد رحيم، فبيسمعوا أغاني من خلال زوجته، وصادف إن الأغنية دي من أرشيف أغاني رحيم، الله يرحمه، اللي ما نزلتش، وهو كان لحنها زمان قبل ما أنا أخد الكلام وألحنها وأنزلها في ألبومي الأول، وأنا شايف إن ده هدف محترم من صديقي رامي جمال، خصوصًا إني اتفاجئت إن المؤلف توفاه الله».
رسالة هيثم نبيل إلى رامي جمال
واصل هيثم نبيل حديثه قائلًا: «وأنا أكيد سعيد إن ألحان محمد رحيم تفضل موجودة بيننا.. مبروك يا رامي الألبوم، وإن شاء الله يكسر الدنيا، وربنا يرحم محمد رحيم والشاعر خالد أمين، ورامي تواصل معايا، والموضوع حصل بمنتهى الود، وعشان مش حابب إن حد يصطاد في الماية العكرة».
واختتم منشوره بالقول: «إحنا في الآخر بنقدم فن يبسط الناس مش بنحارب، وفي حاجات تانية أهم إنسانية تستدعي التجاوز عن التفاصيل الأصغر».
رامي جمال: حصل خطأ غير مقصود
من جانبه، رد الفنان رامي جمال على تصريحات هيثم نبيل، وكتب: «شكرًا حبيبي إنك فهمت الموقف وليك كامل الاحترام، وهي غلطة غير مقصودة من ورثة الغالي رحيم».
وأضاف: «والحمد لله إنها جت مع شخص محترم زيك، ورغم كده مشيت قانوني وخدت إذن منك ومن الجمعية بإعادة النشر تاني، وكله يهون عشان خاطر رحيم وجماله وخالد وورثته، وشكرًا يا هيثم على أدبك وذوقك، مش غريب عليك».
