هنادي مهنا: "بتكلم 3 لغات وبتعلم عربي" (فيديو)
كشفت الفنانة المصرية هنادي مهنا عن معاناتها بسبب اللغة العربية، حيث إنها تتعلم حاليًا كتابة اللغة العربية.
وقالت خلال لقائها مع الإعلامية لميس الحديدي في برنامج "كلمة أخيرة" المذاع عبر فضائية (ON): "بتكلم 3 لغات غير العربي، إسباني وفرنساوي وإنجليزي"، لافتة إلى أنها لا ترسل رسائل باللغة العربية "وأنا بحاول دلوقتي بتعلم أكتب عربي بس بعرف أقرأ بالطبع وبتلخبط بين الصاد والسين، والقاف والكاف وكمان بغلط بين الذال والزاي والظاء، ودول صعبين جدًا ويمكن صعبين علشان ببدأ متأخر وعمري ما أخدت دروس عربي وأنا صغيرة وأنا فخورة بنفسي".
وعن السبب في ذلك، قالت: "والدتي فرنساوية، وكانت كل اللغة في البيت بالفرنسية، والسكريبت بعرف أقراه لو مكتوب بالإنجليزي في الأول كنت بجيب حد يقرأ لي وأكتب السكريبت بالفرانكو وأحفظ بالفرانكو، لكن دلوقتي بقيت أقرأ الاسكريبت بالعربي، وأنا بدأت بالصعيدي وبحبها جدا، وعملت أفراح إبليس ولما حد بيقول كلمة غلط بالصعيدي بترن وكأنها لغتي الأم".
وأشارت هنادي مهنا إلى أنها تشاهد أعمالها الفنية لتتعلم منها "لما بتفرج على شغلي بتعلم منه، وأشوف إيه اللى ماعجبنيش وما أعملوش تاني، مثلا أنى بتكلم بسرعة وباخد كورسات".
وأكدت هنادي: "عندي خطوط حمراء زي أي حد بس مش براعي في الآخر إني بشتغل في مجتمع مصري وبتخيل شعورهم وهما بيشوفوا أي فنان في التليفزيون المفروض هو قدوة وفيه ناس ممكن تقلد فأتمنى دائماً أكون قدوة للأسر تجاه أبنائهم ومش عاوزة أعمل حاجة تضايقهم أو تكون مختلفة عن مجتمعهم".
وسخرت من شائعات انفصالها عن زوجها الفنان أحمد خالد صالح التي ترددت خلال الفترة الماضية.
وقالت هنادي مهنا: "الموضوع مضحك وبيضحكني أوي وقلت كويس أنهم مشغولين في الكلام، وده متخيلينا أننا بينا خلافات أحسن مايحسدونا".
وأضافت: "أكيد زي كل البني أدمين بس مش بتخانق وهو بيغير عليا في حدود الطبيعي".
يذكر أن النجمة هنادي مهنا، شاركت في سباق رمضان الماضي بمسلسل يحمل اسم "مكتوب عليا" وشاركها البطولة أكرم حسني، وأيتن عامر، وحقق العمل نجاحا كبيرا وقت عرضه.
