هشام جمال يتقدم لخطبة ليلى زاهر في «أغرب مكان».. والأخيرة تكشف سرا
حكى الفنان المصري الشاب كواليس ارتباطه بخطيبته ليلى أحمد زاهر، وكيف بدأت علاقتهما والمكان الذي قرر أن يتقدم لوالدها فيه لخطبتها.
وقال هشام جمال، خلال استضافته وخطيبته في برنامج "صاحبة السعادة" مع الفنانة إسعاد يونس، إنه تقدم للفنان أحمد زاهر لطلب يد ابنته ليلى أحمد زاهر عندما كانا في النادي الأهلي، موضحا: "علشان الناس تعرف أد إيه أنا أهلاوي".
وأضاف: "أنا إتقدمت لزيزو في النادي الأهلي، كان عندنا حاجة وإتقابلنا في النادي، وبعد ما خلصنا الموضوع كان رايح عزاء وأنا رايح نفس العزاء، وقعدنا نتغدى في النادي مع بعض، وفجأة خطفته بسؤال هنعمل إيه في موضوع ليلى".
وتابع: "أول سؤال سأله والدها كان الموضوع بدأ إمتى، فقلت له متخافش أنا معملتش أي حاجة تتخطى حدود الأدب والاحترام، واتكلمنا 4 ساعات وكملنا بعد العزاء لغاية الساعة 2 الصبح".
وأكمل: "حكيت له كل حاجة ممكن تبقى مهم يعرفها، وليه إحساسي كده ناحية بنتك، وليه شايف إنك المفروض توافق، وطمنته على حاجات كثيرة، لأن مشكلته الرئيسية إنه بيحب بناته جدا وخايف عليهم، وطمنته بمنطق متخافش عليها".
وردا على سؤال ماذا طلب منه والد ليلى، قال هشام جمال: "في قراءة الفاتحة كان له طلب وحيد، عايزك تاخد بالك من بنتي".
وعن وقت بدء ارتباطهما، حكى هشام أن أول موقف حدث بينهما كان في كواليس تصوير مسلسل "في بيتنا روبوت"، الذي يعتبره الثنائي أنه نقطة التحول في نظرة كل منهما إلى الآخر، من الصداقة والزمالة إلى نوع آخر من الاهتمام.
وقال هشام: "ليلى لما وقعت المسلسل كانت صغيرة في أول سنة 2020، وأول مرة أشوفها في حياتي كانت مع والدها صاحبي وأخويا وحبيبي النجم أحمد زاهر، وفكرة إنها تبقى بطلة المسلسل كانت بعد ما شوفنا لها صورة على كوفر مع والدها وشكلها أكبر من سنها".
وأضاف: "كانت بالنسبالي بنت أحمد زاهر اللي وصاني عليها قبل الشغل، وقال مش هوصيك دي بنتي وصغيرة، وهي فعلا كانت في الكنافة".
وأكمل: "ليلى كانت علطول كل بوستاتها بتقول أخويا الكبير، وفعلا محصلش أى حاجة وقت المسلسل في الجزئين، لحد نقطة معينة الأمور وعلاقة بدأت تتغير شوية يمكن بعد المسلسل بسنة تقريباً لكن مكناش مخبيين على الناس ولا حاجة".
وعقبت ليلى زاهر: "هو فعلا مكنش في أي حاجة خالص، ولما كنا بنشتغل سوا كان شغل وزملاء وأصحاب وبشوفه أخويا الكبير، وهشام جدع مع كل الناس ودايما موجود في المواقف الوحشة قبل الحلوة، واكتشفت ده مع الوقت".
وتابعت: "وقت المسلسل مكنش في أي حاجة بينا وعلاقتنا تطورت خلال فترة معرفتنا ببعض، وأنا يمكن اكتشفت أن عندي حاجة كنت بحسها بس مش فاهمة ده ايه، وكنت عادي بتكلم مع والدي بكل براءة، ودي أول مرة فعلا أحب".
وحكى هشام عن موقف استغلال تعرضت له ليلى عندما بدأ العمل، قائلا: "ثاني يوم في تصوير المسلسل فوجئت إن في حد ماشي ورا ليلى في كل مكان، يخبط عليها ويقول أستاذ فلان عايزك علشان تراجعي معاه المشاهد، وفوجئت إنه صور مع ليلى تيك توك من غير ما تعرف، ونشر حاجات عن المسلسل".
ووصف هشام جمال لحظة المواجهة بينه وبين ذلك الشخص الذي استغل حداثة عهد ليلى بتفاصيل العمل قائلا: "بدأت المعلومات توصل عندي، وطلع واحد غريب نازل يتدرب إخراج، ونزلت دورت عليه في اللوكيشن، وأخذ اللي فيه النصيب، وكان آخر يوم له معانا".
وعلقت ليلى على الواقعة: "أنا كنت مرعوبة في الموقف، هو بالنسبالي شخص طيب، ومتخيلتش أشوف منه الوش ده".
وكشف الفنان أحمد زاهر أن الموعد المحتمل لإتمام خطبة ابنته ليلى وهشام جمال هو الصيف المقبل، بعدما احتفل بقراءة فاتحة ابنته في أجواء عائلية مطلع العام الجاري تمهيدا لإتمام خطبتهما.
وشارك الثنائى فى مسلسل فى بيتنا روبوت ويحكي قصة يوسف مهندس برمجيات شاب (هشام جمال)، يقوم بتطوير نموذجين من البشر الآليين، أولهما على هيئة أنثى اسمها "زومبا" (شيماء سيف)، والثاني على هيئة ذكر يسميه "لذيذ" (عمرو وهبة)، ليقوم الاثنان بمساعدته في شركته ومساعدة زوجته سارة (ليلى أحمد زاهر) على القيام بأعمالها المنزلية.
