جمال العدل يكشف سر عدم تعاونه مع عادل إمام: أشعر بالندم

أكد المنتج المصري جمال العدل، أنه لم يستطع إنتاج عمل للفنان عادل إمام بسبب اختلاف طريقة كل منهما في ترتيب الأمور.

وقال العدل، في حواره مع الإعلامية بسمة وهبة مقدمة برنامج "العرافة"، على قناة المحور: "لما قعدنا عشان نشوف هنعمل إيه، كان عاوز يشتغل بنفس الشكل اللي شغال بيه، بنفس المخرج والمؤلف ونفس الناس، كنت عاوز أضيف وأغير وأحس إني مختلف عن المنتج اللي كان معاه".

وتابع: "أنا مفتقد عادل إمام، وشايف إنه معدي أي حاجة، أنا ندمان إني معملتهوش أي حاجة، ودلوقتي ممكن أوافق باللي يقول عليه، خدتني العزة، وكان نفسي أعمله حاجة مختلفة شوية".

وتطرق العدل، في حواره إلى مسلسل "بـ100 وش"، ووضع الفنان مصطفى درويش كاسم ثالث بعد نيللي كريم وآسر ياسين، موضحًا: "بعد نيللي وآسر ياسين كل العصابة زي بعض، مصطفى اشتغل معايا 10 أعمال، وكلهم عندي زي بعض، والحمد لله إنهم نجحوا وبقوا موجودين في أكتر من مسلسل".

وأكد، أنه غضب من مصطفى درويش بعدما انسحب من فيلم الملحد، واصفا إياه بأنه مزايدة لا معنى لها، مضيفا: "حسيت إنه راجل مش لطيف وبايخ لأنه ميصحش يعمل كده على الملأ، حتى لو عنده رأي عيب يعلنه كده، خاصة إن مخرج العمل من أهم الناس اللي طلعوه، اللي عمله مزايدة وحاجة تخص التريند والسوشيال ميديا وهو موقف سخيف وملوش لازمة".

وقال إنه يقود الأعمال التي ينتجها بالشراكة مع المخرج، إذ يؤمن بأن المخرج هو رب العمل، موضحًا: "كل واحد بطل في دوره، والسنة دي بشوف إن الفنان محمد ثروت المفروض يتبوأ مكانة مهمة جدا في الكوميديا والتمثيل ويبقى بطل مسلسلات وأفلام".