مصطفى أبوسريع يخوض تجربة غير تقليدية ويكشف سر «أغنية شادية» (خاص)
عبّر الفنان مصطفى أبو سريع عن حماسه الكبير لخوض تجربة درامية جديدة وصفها بالمختلفة، مشيرًا إلى أن ما يشجعه دومًا هو خوض أفكار جديدة وتقديم تجارب غير تقليدية.
وأوضح مصطفى أبو سريع: "اللي بيحمسني إني أشتغل هو الفكرة الجديدة والتجربة المختلفة، وأنا بحب معتصم جدًا، وبعتبره من الممثلين المهمين في الوطن العربي، ومتحمس جدًا للشغل معاه، وأتمنى التجربة دي تتكرر مع ممثلين كتير".
شخصية مصطفى أبو سريع في مسلسل "أنا أنت.. أنت مش أنا"
كشف مصطفى أبو سريع عن ملامح شخصيته في المسلسل الجديد، موضحًا أنه يقدم دورًا يساعد فيه بطل العمل في علاقته العاطفية، حيث قال:
"الشخصية اللي بقدمها ليها دور في حياة معتصم، هو عنده مشكلة في علاقته بحبيبته، وأنا اللي بديه نصايح علشان يعرف يتعامل معاها".
وأكد أن الممثل لا يُقاس فقط بالوسامة، بل بالحضور والكاريزما، مضيفًا: "الممثل لازم يكون عنده حضور، إنما الوسامة دي من عند ربنا".
التغيير الإيجابي يبدأ من الذات لا من التكنولوجيا
أوضح أبو سريع رؤيته لمسألة التغيير الذاتي، مؤكدًا أن الذكاء الاصطناعي ليس الحل لكل شيء، وقال: "أنا متمناش أغير أي حاجة في حياتي خالص، بس اللي بتمنّاه إننا نغير الحاجات السلبية اللي في حياتنا، بس مش الذكاء الاصطناعي هو اللي هيغيّرها، الإنسان هو اللي لازم يغيّرها".
وأضاف موضحًا: "لو عاوز تعمل شكل كويس، العب رياضة وكل كويس، لو عاوز تقرب من ربنا، صلّي، علشان تتطور وتبقى أفضل وتبقى إيجابي".
رضا الجمهور وتطوير الذات
تحدث مصطفى أبو سريع عن تقديره للجمهور وحرصه على الاستماع لآرائهم، موضحًا: "أي حد بيسعى إنه يبقى أفضل في اتجاه مسؤولياته وبيته، ويبقى ليه دور محترم، أنا ببقى سعيد جدًا لما الناس بتنبسط، وده حسب كل شخصية بقدمها واشتغل عليها".
وأكد أن الجمهور هو صاحب الكلمة الأولى في تقييم أي عمل، مشيرًا: "الجمهور هو دايمًا اللي بيحسسني بالنجاح، ودايمًا محتاجين الأفضل، وأنا بتكلم عن نفسي إني بسمع الناس، وإن الجمهور من حقه يقول رأيه".
أغنية شادية في "العتاولة 2".. من فكرة إلى تنفيذ
أشار أبو سريع إلى كواليس أغنية شادية التي ظهرت في مسلسل "العتاولة 2"، موضحًا أن الفكرة جاءت من المخرج أحمد خالد، وقال:
"فكرة أغنية شادية في مسلسل العتاولة 2 جت لما أستاذ أحمد خالد قالي عاوزين نعمل فكرة الحلم، إنه عاوز يروح لكل الناس ويقولهم إنه عاوز يرجع لشادية، واشتغلنا على كلماتها وألحانها وتوزيع ساسو".
