عمرو صالح: لا دليل على وجود الحب.. و«هيبتا 2» يكشف جوانب غير متوقعة (خاص)
عبّر الفنان عمرو صالح عن حماسه الكبير لمشاهدة فيلم "هيبتا- المناظرة الأخيرة"، مؤكدًا أنه ينتظر العمل بشغف لأنه يعيد الرومانسية إلى الشاشة المصرية بعد غياب ملحوظ لأفلام هذا النوع في السنوات الأخيرة.
وقال صالح في تصريحات خاصة لـ"العين الإخبارية": "أنا متحمس جدًا للفيلم، ومش عارف هيطلع في الآخر عامل إزاي، بس متخيل إنه هيكون فيلم حلو. إحنا أصلًا ما عندناش أفلام رومانسية كتير، ودي حاجة مفتقدينها جدًا، فمجرد وجود فيلم رومانسي بحد ذاته حاجة حلوة".
وتابع موضحًا فلسفته الخاصة عن موضوع الفيلم: "أنا بشوف إن فكرة الحب نفسها مثيرة للتفكير، هو أصلًا فيه حاجة اسمها حب؟! دي وجهة نظري. لأن الكلام عن الحب في حد ذاته نوع من التأمل في لغز إنساني كبير. أنا مؤمن بالحب جدًا، بالعكس بتمنى يكون موجود فعلًا، بس مفيش دليل علمي على وجوده، وده هو الجمال فيه، إنك كل مرة بتفضل تسأل نفسك: هل هو موجود فعلًا ولا لأ؟".
وأضاف صالح: "عشان كده أنا مؤمن إن أي فيلم بيتكلم عن الحب هو فيلم مهم، لأنك من خلاله بتحاول تكتشف جانب من نفسك، أو من مشاعر الناس حواليك. الحب ممكن يكون جميل، بسيط، متعب، بس في النهاية هو اللي بيخلينا بشر".
وعن رؤيته للحب في زمن التكنولوجيا، قال الفنان الشاب: "أكيد التكنولوجيا غيّرت شكل العلاقات، بس الحب نفسه لسه ليه وجود، حتى لو اختلفت وسائله. فيه ناس بتتعرف على بعض من خلال السوشيال ميديا، وبتكمل وتنجح، وناس تانية بتفشل، وده طبيعي جدًا. المهم إن المشاعر الحقيقية لسه موجودة في وسط كل الزحمة دي".
وفي ختام حديثه، كشف عمرو صالح عن مشاريعه الفنية المقبلة قائلًا: "أنا بشتغل حاليًا على مسلسل اسمه (ميدتيرم)، وكمان بعمل مسلسل تاني ينتمي لنوعية الجريمة والإثارة، ودي تجربة مختلفة تمامًا بالنسبة لي، لكن في النهاية، سواء كان عمل اجتماعي أو بوليسي أو رومانسي، المهم يكون بيقدّم فكرة حقيقية توصل للناس".
واختتم صالح حديثه قائلاً: "أنا متفائل جدًا بالفيلم وبالفترة اللي جاية للسينما المصرية، لأن الجمهور محتاج يشوف مشاعر حقيقية، محتاج يشوف حب حتى لو مجرد سؤال: هل لسه فيه حب؟".
أبطال فيلم "هيبتا 2"
وتؤدي بطولة الفيلم منة شلبي أمام كل من كريم فهمي، ومحمد ممدوح، وجيهان الشماشرجي، وسلمى أبو ضيف، وكريم قاسم، ومايان السيد، وحسن مالك، فيما يحل كل من أشرف عبد الباقي وهشام ماجد ضيفَي شرف على الفيلم.
الفيلم من تأليف الأديب محمد صادق، الذي شارك في كتابة السيناريو والحوار مع محمد جلال ونورهان أبو بكر، ومن إخراج هادي الباجوري، وإنتاج أربع شركات.
aXA6IDIxNi43My4yMTYuMjE3IA== جزيرة ام اند امز
