إياد نصار: صانع المحتوى قد يصبح ممثلاً إذا حافظ على هويته (خاص)

أكد الفنان إياد نصار أن الطريق إلى التمثيل تغيّر بشكل كبير، وأن صناعة المحتوى أصبحت أحد أهم أبواب دخول المواهب الجديدة إلى عالمالدراما والسينما، شرط أن يحافظ الفنان على هويته وألا يقدم ما يناقض أفكاره أو أسلوبه الفني.

وقال نصار في تصريحات خاصة لـ"العين الإخبارية"، إن التسويق الذاتي أصبح جزءًا أساسيًا من مهنة التمثيل، موضحًا: "الممثل لازم يعمل ماركتنج لنفسه.. زمان كان ده معناه ورش تمثيل، مكاتب كاستينغ، ومحاولات كتير. النهارده السوشيال ميديا بقت جزء مهم لأي ممثل مبتدئ، سواء إنستغرام أو غيره، وكلها أدوات ماركتنج مهمّة".

وأضاف أن دخول بعض صناع المحتوى إلى عالم التمثيل ليس خطأ في حد ذاته، بل قد يكون خطوة مهمة إذا استُخدمت بالطريقة الصحيحة:"لو أنت ممثل وبتعمل محتوى بيماركتلك كممثل.. ده مهم. بس لازم تعرف أنت عايز تبقى إيه كممثل، وما تعملش حاجة ضد طريق تفكيرك عشان المشاهدات. التناقض ده هيؤذيك".

وتحدث نصار عن دور النقابة في تنظيم المجال، مؤكدًا أن الحل ليس في المنع:"المنع مش حل.. فيه آلاف المواهب اللي ما عندهاش طريق غير المحتوى عشان تقدم نفسها. لازم تنظيم وتقنين ورقابة، لكن من غير ما نقفل الباب في وش حد فعلاً موهوب. محتاجين عين الخبير اللي يميز ويختار ويوافق ويرفض بحكمة".

وأشار إلى أن صناعة المحتوى قد تكون بوابة ذهبية لممثلين حقيقيين أثبتوا وجودهم:"فيه ناس كتير بدأت محتوى، والنهارده بيمثلوا في مسلسلاتهم الأولى. نجحوا لأن عندهم خصوصية.. حاجة من قلبهم مش تقليد. الجمهور بيحس بالتميّز وبيستقبله بحب، ودي قصص نجاح حقيقية".

وشدد نصار على ضرورة أن يترك صانع المحتوى بصمة خاصة:"المحتوى لازم يكون فيه وجهة نظرك أنت.. بصمتك.. خصوصيتك. مش مجرد لبسنج أو تقليد. لما تقدم حاجة صادقة بجد، هتوصل وتتميز مهما كانت بسيطة".