سهير المصرية ترفع دعوى خلع: "يرفض المايوه ومعاشرته مستحيلة"

قالت السيدة في دعواها إنها شعرت في البداية بوجود اختلافات اجتماعية بينها وزوجها لكنها ظنت أنها ستتلاشى بعد الزواج

تقدمت سيدة مصرية تدعى "سهير.م"، بدعوى خلع من زوجها البالغ من العمر 31 عاما، أمام محكمة الأسرة حملت رقم 3548، مبررة لك باستحالة العشرة بينهما، خاصة مع غيرته المرضية عليها. 

وقالت السيدة في دعواها إنها شعرت في البداية بوجود اختلافات اجتماعية بينها وزوجها، لكنها ظنت أنها ستتلاشى بعد الزواج وهو ما لم يحدث: "أسرته كانت مختلفة عننا شوية منغلقين ومستواهم أقل مننا شوية، هو مهندس ديكور ومكنتش فاكرة الحال هيبقى كده، اتعرفت عليه لما كان بيعمل ديكور أوضتي (غرفتي)"، حسب صحيفة "الوطن" المصرية.

وأشارت إلى أنه شديد الغيرة عليها، ودوما يملي عليها ما يجب فعله: "بيدخل في كل حاجة في حياتي لبسي وأصحابي وحتى علاقتي بأمي وأبناء خالي اللي زي أخواتي".

وأضافت: "أول مرة اتخانقنا كانت يوم الخطوبة بسبب إن ابن خالي سلم عليّ وباسني فقلب بوزه طول الخطوبة، وبعدها عمل مشكلة بحجة إنه عيب وإنه من أسرة تقليدية وميصحش إني أسلم على ابن خالي أو حد من أصحابي وأبوسه مع إن دول زي أخواتي لكن هو كان طبعه بلدي وكنت فاكرة إنه هيتغير بعد الجواز".

ترغب "سهير" في التحرر مما وصفته بـ "السجن" داخل بيتها: "مفيش خروج مع أصحابي وطبعا بنات بس ولبسي كله مش عاجبه ومفيش مايوه لا بكيني ولا عادي، مش عايزني أنزل البسين أو البحر في أي مكان حتى لو هو معايا، ممنوع أعمل أي حاجة في حياتي غير أقعد في البيت بس، حتى الكوافير لازم مامي تكون معايا.. وأخرها طلب مني ألبس الحجاب زي والدته".

وتشير إلى أنها طلبت الطلاق لكنه رفض: "قالي ده نظامي وعشان كدة رفعت خلع".